Јужно од границата, западно од сонцето - Харуки Мураками

Колку интересна е човечката психа, или, како што Hajime, нараторот на овoj роман на Харуки Мураками на тивка психолошка моќ, го става, "Човечко суштество може, само со своето живеење, да оштети друго човечко суштество без да се поправи." И кога тоа ќе се случи, личноста која предизвикува штета е засекогаш повредена исто така.

"Може сум ја изгубил можноста некогаш да бидам пристојно човечко суштество," Hajime вели како што го минува својот 20ти роденден. "Грешките што ги направив - можеби тие биле дел од мојот живот со многу шминка, неизбежен дел од моето битие." Грешките што Hajime ги објаснува во "јужно од граница та, западно од сонцето" не се повеќе од вообичаениот акт на себичноста, луѓето се склони да ги извршуваат без искуство и задоволство.


Централна фигура е Hajime, роден, како што нѝ кажува на првата страница, на почетокот на втората половина на векот, но тој е многу "просечно" лице од "типично" семејство. Тој е, со други зборови, член на генерацијата што повторно ја населува Јапонија по Втората светска војна. Ако има нешто необично во врска со Hajime е тоа што тој е само дете на кое му пречи што други луѓе претпоставуваат дека мора да бидат ''ограбени, слаби и егоцентрични.'' Во својата осаменост и чувство на изолација, Hajime има само еден вистински пријател, една девојка по име Shimamoto.

Shimamoto има детска парализа, детството ја остава со една нога пократка и таа мора да поткривнува кога оди. Тие имаат врска која опстојува само во нивниот свет, но која се растура кога родителите на Shimamoto ќе се преселат далеку од главниот лик. Она што оваа книга го нуди не е само тоа што може да се прочита. Ние се задлабочуваме и започнуваме да размислуваме како авторот.

Се чита во еден здив, а се памети вечно.

„Мемоарите на една гејша“ - Артур Голден

Делумно историски роман, делумно бајка, делумно романса, ова не е само роман полн со добродушни портрети на жени, туку и вешто набљудувана слика на еден необичен, и во голема мера, исчезнат свет. Во ист миг ни се откриваат сјајот и бедата на еден далечен свет, темелите врз кои тој е изграден, сфаќањата и вредностите на една култура. Во тој утврден систем, се одвива една индивидуална судбина, животот на едно човечко суштество чии желби, радости и таги, забранета љубов и страдање се борат со санкциите и ограничувањата; и во таа неизвесна битка, гејшата Сајури настојува да го осмисли сопственото постоење, да ја достигне сопствената среќа. Толку далечна, а сепак толку блиска и дофатлива приказна.

„Хари Потер“ - Џ.К.Роулинг

Не верувам дека некој не слушнал за волшебникот  Хари. Како и да е, „Хари Потер“ е серијал од седум фантастични книги напишани од британската авторка Џ. К. Роулинг. Книгите ги следат авантурите на адолесцентниот волшебник Хари Потер и неговите најдобри пријатели Рон Визли и Хермиона Гренџер, од кои сите се ученици во училиштето за магии и волшебништво Хогвортс. Централното дејствие се сосредоточува околу борбата на Хари со злобниот волшебник Лорд Волдеморт, кој ги убил родителите на Хари во походот да го освои волшебничкиот свет и да го потчини неволешбничкото општество. Направени се неколку успешни филмови, видеоигри и други разновидни трговски производи базирани на серијалот.

Деловите по хронолошки ред:

Хари Потер и Каменот на мудроста
Хари Потер и Одајата на тајните
Хари Потер и Затвореникот од Азкабан
Хари Потер и Пламениот пехар
Хари Потер и Редот на фениксот
Хари Потер и Полукрвниот Принц
Хари Потер и Реликвиите на смртта

„Рингишпил“ - Јелена Бачиќ Алимпиќ

Нејзините движења се поелегантни и посуптилни од секоја нота. А, нејзиното тело е синоним за страст и убавина. Елеганцијата, лирското изразување, емоциите и грациозноста се соединуваат во едно име: Ана Балинт.
Знаеше дека го сака него, единствениот, со страсна длабока и листа немерлива љубов. Сите останати љубови во нејзиниот живот беа само бледи копии на тоа незаборавно чуство за блискост; таа припадност кон друга душа, во која се скриени нејзините огледала, со неописиви елегантни и нежни емоции.
Јелена Бачиќ Алимпиќ испишува интимна приказна за балерината со нежно тело и џиновски дух, која остава печат на сите славни балетски сцени, градејќи приказна за малите-големи луѓе, за салашарите и уметниците, поетите и нивните музи, за утратата што мирисаат на слатко од дуњи и незаборавни руски зими.

„Сенка на ветрот“ - Карлос Руис Сафон

Барселона 1945. 
Градот полека ги завлекува раните од војната, а Даниел, син на трговец со антикварни книги, дете што тагува по својата изгубена мајка, си наоѓа утеха во мистериозната книга Сенка на Ветрот, што ја напишал извесен Хулијан Караш. Но, кога почнува да бара и други наслови од истиот автор, доаѓа до шокантно откритие: некој систематски го уништува секој примерок од книгите што ги напишал Караш! Даниел можеби го има последниот примерок. Наскоро неговата привидно безизлезна потрега ја отвора вратата на една од најмрачните тајни на Барселона – епска приказна за убиства, лудило и проколната љубов.

„Без збогување“ - Линвуд Баркли

Се будиш едно утро и сфаќаш дека го нема твоето семејство, помислуваш дека заминале порано од дома за да не се сретнат со тебе после карницата од претходната вечер.
Разгледуваш наоколу, гледаш нема подготвено појадок, си помислуваш сигурно оставиле порака. Но, за жал нема трага дека тие ја поминале ноќта во своите кревети.
Се прашуваш: Што се случува? Каде заминале? Ако им се случило нешто, зошто останав само јас поштедена? Следат милиони тешки прашања на кои не може да се одговори...
Ова ѝ се случи на четиринаесетгодишната девојка, Синтија Биж која го изгуби своето семејство и се справуваше со таа траума цели 25 години, сè до еден ден кога доби писмо во кое тешко се наоѓаа одговори и ја зголеми нејзината надеж дека можеби сега ќе открие што се случило со нејзиното семејство. И дозна дека пребарувањето во минатото може навистина да биде исполнето со тешкотии и ризици.Оваа книга е прекрасен трилер кој не ви дозволува да ја оставите затворена сè додека не се откријат најдлабоките мистерии кои ве тераат да читате до самиот крај.

„Клетници“ - Виктор Иго

„Не е страшно човек да умре, страшно е да не живее“

,, .. Постои една глетка што е поголема од морето, тоа е небото;
Постои една глетка што е поголема од небото, тоа е внатрешноста на душата.. ‘‘

Клетници е француски роман од авторот Виктор Иго напишана во 1862 година, и нашироко се смета дека е еден од најзначајните романи на деветнаесетиот век. Ги следи животите и интеракциите на неколку француски ликови во период од 17 години во почетокот на 19 век, Клетници содржи многу заплети, но главната нишка е приказната на поранешниот осуденик Жан Валжан (познат по неговиот затворски број 24601) кој станува олицетворение на доброто во светот, но не може да го избегне неговото страшно минато.
Популарноста на оваа новела почнува со нејзиното издавање, а продолжува до ден денес, и многумина ја гледаат како една од најважните новели некогаш напишана. Врз нејзина основа  се снимани филмови, се изведувани многу театарски претстави

Последниот чај - Винка Саздова

Спакувај се и замини! Каде? Што е можно подалеку. Зошто? За да дознаеш. Што? Не прашувај. Одважи се и тргни! Можеш ли!? Ако може жената од Последниот чај можеш и ти!Препушти ѝ се да те одведе.......до самиот себе!!!!!!!

Како топол утрински чај, романот на Винка Саздова, повикува на будење, расонување од она што нараторот не е, и свесност за она што е, она што се Саздова, што се ликовите во романот, што е читателот...

„Последниот чај“ е спокојна приказна за копнежите по спокојството.Последниот чај ги отвора нашите сопствени приказни. Нè охрабрува  да се соочиме со нив и да ги прифатиме такви какви што се, убави или грди, сеедно.

Ова е роман во кој понекогаш и една единствена реченица е голема приказна врз која се останува долго време.

Толку долго колку што е потребно таа да се спои со личната приказна на оној што ја чита.

Чајот како метафора на животот, како оние миниметафори на дневникот, книгата, но најмногу чајот... оној за кој е сеедно од што е... едноставно е чај... билки и топла вода... И, кога еднаш очите на вистината ќе погледнат преку очите на родителот, преку текстот, останува само таа, вистината, вистината за љубовта, вистината за самата вистина.

Сочувствителен. Љубовен. Нежен, а цврст. Меко што зборува за груби болки и вистини, покажувајќи како се исцелуваат и претвораат во спокојство.

Купи ја книгата

http://www.kupikniga.mk/BookDetails.aspx?Pr=62

Девствено сино - Трејси Шевалие

I . Француско средновековие, патријархален брак, црвенокоса приврзаничка на Девицата Марија.

II . Преселба и адаптација, навидум совршена врска, единствениот Париз.

Сплет на две историски судбини, мистеријата на сината наметка и неминовната трагична жртва на малечката црвенокоса... Чудесна приказна за две жени, родени во различни времиња, кои ги поврзува длабока семејна нишка.

Ела Тарнер дава сè од себе за да се вклопи во малата, цврсто поврзана заедница на француското гратче во кое се доселува. Дури и повторно го презема презимето Турние и го обновува гимназиското познавање на францускиот јазик. Избегнувана и осамена, чувствува потреба да ги проучи своите претци од фамилијата Турние, а исходот од тоа истражување ќе биде неочекувано болен.

Славни во смртта - Нора Робертс

Славни во смртта е продолжение на книгата Голи во смртта на Нора Робертс, во тоа време пишувани под нејзиниот псевдоним J.D ROBB. Книгите се поврзани, но секако можат да се читаат и независно една од друга. Во секој случај комплетната слика ќе ја имате доколку по правилниот редолед ги прочитате двете, значи најпрво Голи во смртта, а потоа Славни во смртта. Ако повторно очекувавте од Робертс некое лесно љубовно романче кое ќе ве наполни до даска со позитивна енергија тогаш ќе морам да ве разочарам и да ви кажам дека тоа нема да го добиете. Она кое ќе го добиете сепак и не е така лошо, напротив, одлично е!
Добивате еден одличен трилер кој така добро ќе ве извози од првата до последната страна што ќе бидете изненадени.
Детективката Ив која одлично се снајде со решавањето на сериското убиство во претходниот дел сега повторно е ставена пред еден голем предизик.
Умираат жени... не, поточно, некој убива жени. Убива само жени. Убива само славни, успешни, познати кариеристки. Кој е убиецот и како да се пронајде истиот кога толку многу луѓе имаат мотив за убиство?
Ми се допадна тоа што навистина не можев да сфатам кој е убиецот! Дури кон крајот на книгата, кога веќе почнуваат малку по малку да се отвораат картите, тогаш почнувате да се сомневате во вистинската личност.
Друга работа која ми се допадна во врска со оваа книга е тоа што покрај одличниот трилер кој цело време ве држи во неизвесност, во книгата има испреплетена љубовна приказна. Тоа не е „лигава“ приказна која е ставена во центарот на книгата туку е приказна која се провлекува во текот на целата книга и дава дополнителна убавина на секоја страна.
Генерално, книгата со своите два дела навистина ми се допадна и сметам дека е добро тоа што овие книги се воделе под псевдонимот бидејќи имате чувство како да се работи за сосема друг писател, а и самата книга е како да е напишана од друг писател.

Би ја препорачала на секого да ја прочита!

Прашање на избор - Нора Робертс

Џесика е една прекрасна, нежна девојка која изгледа преубаво и потекнува од едно богато семејство. Таа иако нема потреба од дополнителни примања, за свое лично задоволство и од љубов кон антиквитетите води една своја антикварница. Но, позади она што таа го гледа се случуваат и нешта за кои таа не знае, а истите можат да го доведат нејзиниот живот во опасност. Имено, криумчарење на скапоцени камења се врши токму преку антиквитетите кои таа ги продава во Лондон. Затоа, темнокосиот, згоден мачо наредникпротив своја волја е испратен да биде нејзина „дадилка“ која треба да ја заштити.
Нормално тој е прикриен со добра приказна бидејќи таа не би дозволила да биде чувана од страна на некој полицаец, а исто така би било премногу опасно веднаш да дознае што се случува во нејзината продавница.
Џесика и Слејд се чиста спротивност еден на друг, како вода и масло, тие не можат да одат заедно, не можат да се спојат. Таа е нежна, богата, подготвена да љуби, а тој е дрзок, безобразен, далеку од богат и преплашен на смрт од идејата да биде вљубен или љубен од страна на оваа „богаташка“, како што тој ја нарекува. Да, низ книгата ќе прочитате различни навреди за неа од него, идиот, сноб... но тој секако нема да биде доволно силен за да одолее.
Нора Робертс уште еднаш ќе Ве фати за рака и ќе Ве поведе по страниците на својот роман за многу кратко време. Нема да почувствувате досада. Трилер елементи испреплетени со романтичните моменти кои го носат печатот на раскажувањето на Робертс. Реални ликови, полни со живот, убаво претставени и уште поубаво инкорпорирани во една приказна...
Секој прочитал нешто од Нора Робертс знае дека не може да очекува на крајот да остане стаписан или затечен затоа што не можел да го предвиди крајот на настаните, па сепак ова не е Шелдон, Ладлам или Браун. Знаеме дека Робертс крои лесни приказни кои се читаат во еден здив.Но, за сите оние кои ги сакаат сите книги, исто како мене, без разлика дали се тоа напнати трилери, трогателни драми, литературни евергрини и слично, оваа книга ќе им се допадне. Уживајте!

Паднати Ангели - Нора Робертс

Рис Гилмор бега од „демоните“ кои ја прогонуваат откако ќе биде единствената преживеана од едно масoвно убиство.
Постојано во исчекување дали ќе ја пронајде убиецот и ќе го доврши тоа што го започнал таа доаѓа во државата Вајоминг во едно мало и зафрлено гратче Angels Fall.
Кога прв пат ќе го види гратчето таа едноставно решава дека ќе остане тука и повеќе нема да бега туку ќе се соочи со своите демони и панични напади.
Angels Fall (така е и оргиналниот наслов на книгата) е мирно место во кое живеат мирољубиви луѓе, а меѓу нив е и неодамна доселениот Броди.
Еден ден додека Рис оди на прошетка по планината, го сретнува Броди, но не му обрнува внимание и продолжува понатаму, а таму... горе... од другата страна на провалијата гледа... неверојатна глетка... дали тоа на неа ѝ се случува... не не е можно!? Гледа маж и жена, се караат, тоа станува агресивно... ништо не се слуша, многу е далеку... тој е над неа... ја убива...

Се поставуваат многу прашања:
Дали навистина се случи тоа?
Кои беа тие?
Како ќе се справи Рис со ситуацијата која ѝ се наметна?

Краеви и Почетоци - Нора Робертс

Решив да прочитам нешто што досега ретко сум читала, да речеме на пример љубовен роман, но во мојата малечка библиотека не најдов ништо такво, освен една книга која веќе ја имав прочитано. Подоцна на мојот роденден, како подарок ја добив оваа прекрасна книга Нора Робертс - Краеви и почетоци. Книга побарав - книга добив!

На задната корица пишува: „Младата ТВ Новинарка Оливија Кармајкл, желна за успех во кариерата и длабоко повредена од љубовниот живот, го сретнува нејзиниот директен ривал, познатиот и популарниот ТВ Новинар Т.Ц. Торп. Приказната започнува...“

Овие две реченици ме освоија и останав будна цела вечер само за да ја прочитам. Едноставно не можев да ја оставам настрана иако можеби и повеќе ќе уживав во речениците ако бев малку повозрасна...


Кој ќе добие подобра приказна? Торп или Кармајкл? Веќе една година, Торп ја посакува совршената Кармајкл веќе подолго од една година, но таа, пак, не може да го поднесе фактот што тој секогаш пред неа ги добива сите важни приказни и репортажи... А потоа, поради сплет на околности, ривалите стануваат премногу блиски.

Тие се совладани од желбата еден за друг, од страста и потребата за допир. Кармајклова совршено ги контролира своите чувства и го чува високо подигнатиот штит околу неа, се додека Торп не ѝ се приближи - тогаш станува ранлива на неговите бакнежи. Откако Торп ќе успее да го пробие тој цврст штит, таа практично му ја отвора својата душа, му се препушта на човекот за кој порано гаеше само чувства на бес и мала завист.

Иако Лив не верува во сигурноста во тврдењето на Торп, го прифаќа обложувањето.

П.С. Потоа, за жал (или за среќа!), му должи 100 долари...

Голи во смртта - Нора Робертс

Ова е првата од „Во смртта (In Death)“ серијата на Нора Робертс, која ја пишува под псевдонимот Џ.Д. Роб. Книгата ја купив на ланскиот саем во српско издание. Барав криминалистички роман, а она што го прочитав на задниот дел од книгата го привлече моето внимание и решив да ја купам... Дефинитивно не погрешив.

Точно како што пишува на задниот дел од книгата: Совршен баланс на напнатост и врела романса... навистина сјајна забава... секако ќе посакате уште.

Во продолжение, почнувам со она што уште пишува на задниот дел од книгата поткрепено и дополнето со мое мислење.


Ив Далас е детективка во полицијата во Њујорк која живее за својата работа. За повеќе од десет години колку што е во служба, видела сè - и знае дека нејзиниот опстанок зависи од инстинктот. Но, таа оди против сите предупредувања кои ѝ кажуваат да не се впушта во врска со Рорк, харизматичен ирски милијардер и осомничен во последната истрага за убиство која ја води токму Ив.

Една лиценцирана проститутка е ладнокрвно убиена во својот кревет... Три истрели од антиквитетно оружје. Еден во челото, еден во градите и еден во гениталиите. Покрај неа стои пораката ЕДНА ОД ШЕСТ! Што кажува дека ова е само почеток на серијата убиства кои помалку или повеќе водат токму кон Рорк.

Дали женската интуиција на Ив ќе биде во право или ќе ја изневери носејќи ја во рацете на убиец?

Трилер составен од неколку морничави, несекојдневни приказни... зачинет со гнасотијата на инцестот и родосквернавењето... Прв од серијата книги на Робертс кој навистина верувам дека ќе ви се допадне како и на мене.

Дебитантка - Даниела Стил

Семејството Рубинштајн е современо, совршено семејство какво што секој би посакал. Олимпија Рубинштајн, некогаш Крофорд е правник има три деца од првиот брак и едно од вториот со Хари. Поради бракот со Хари таа се преобратила и преминува во еврејската вера, но децата од првиот брак ги воспитува да си ја почитуваат својата вера и нормално еврејската, така што ги празнуваат сите празници и католичките и еврејските. Во таква една идилична атмосфера живеат Рубинштајнови.

Но... еден петок доаѓа една покана за двете девојки во семејството.

Тие се матурантки и близначки,но со дијаметрално спротивни сфаќања.


Едната Вероника со омраза кон расистите и оние кои ги делат луѓето по народноста,по религијата и која се залага за мир во светот, за нејзиниот вистински татко таа е комунист, за самата себе таа е обединување на Мајка Тереза и Че Гевара.

Другата Вирџинија не ја интересира политика,само сака забава, сака да чита модни списанија, да се дотерува според највисоката мода. Тој петок поканата беше по повод балот кој се организира традиционално и тоа за нив двете бидејќи се со сина крв, мајка им припаѓа на благородничко семејство. Вероника го смета балот за антисемитски, расистички, неетички и не сака ниту да слушне да оди, додека Вирџинија очајно сака да оди.

За да биде уште повозбудлива ситуацијата и нивниот очув Хари се согласува со Вероника.Оливија е растргната меѓу два огна, но и таа сака нејзините керќи да одат на тој бал и смета дека тоа е само обичен бал и дел од традицијата, нејзината баба, а потоа и нејзината мајка и самата таа учествувале на тој бал. Балот се организирал еднаш годишно учесничките биле млади девојки со нивните родители, но предуслов да бидат поканети било нивното потекло.

Целта на овој бал била да се претстават младите девојки пред високото друштво,девојката првин требало да игра со својот татко, а потоа со придружникот и да биде официјално претставена.

Дали ќе се појават двете Пепелашки на балот или не останува сами да откриете.

„Демијан“ - Херман Хесе

Демијан е вистинско животно дело позади кое стои познатото име од светската литература - Херман Хере. Во оваа книга овој светски писател пишува за една најзначајна тема во животот на еден човек, спознавањето на себеси. Тоа е и целта на нашиот живот, кога се спознаваме себеси, го познаваме и целиот свет. Главниот лик во книгата е Синклер, една изгубена душа која се наоѓа помеѓу два света. Едниот е добар - неговиот дом, другиот е лош, оној надвор од неговиот дом. На крстосницата на животот, кога треба да донесе одлука по кој пат ќе тргне и дали ќе стане човек, да, и тоа не е лесно, да станеш човек, зашто има и такви кои до крајот на животот остануваат на најниското ниво на својот развој, без да станат луѓе. Иако немоќен и збунет, носејќи го знакот на смелост, ќе се најде некој кој ќе го насочи на вистинскиот пат. Тоа е Демијан.
Трнлив е патот до осознавањето на себеси, Синклер ќе треба да го искуси и злото, за да го обликува својот знак и да го пронајде Демијан во себеси.
Книгата е генијално дело кое во различни фази од животот различно се доживува но, сепак од неа се издојува единствената и безвременска порака за себеспознавањето 

Интимните животи на Пипа Ли - Ребека Милер

Интимните животи на Пипа Ли е неверојатно мудро и вешто напишано дело кое ќе ве остави без здив доколку го прочитате! Оваа е една книга која лично мене многу ми се допадна иако искрено не очекував многу од неа...

Тоа е роман во кој доста умешно е вкомпонирана една животна приказна за нејасните и збунувачки патишта што ги минуваме и кои прават од нас тоа што навистина сме.

Читајќи ја имате чувство дека полека како во сон ви се разоткрива дејствието, а воедно имате чувство како да пронаоѓате врата во својата соба која до сега не сте ја забележале, па од љубопитност ја отворате, а од другата страна наидувате на еден цел свет за кој не сте знаеле дека постои...


Така и Пипа Ли мислејќи дека живее среќен и мирен живот исполнет со љубов ненадејно станува сведок на спротивното! Воопшто не била свесна за некои работи...

Ребека Милер го преточила она што сите го знаат, но не сакаат да си го признаат... дека е невозможно да се разоткрие животот во целина!!!

Никаде без ќерка ми - Бети Махмуди со Вилијам Хофер

Никаде без ќерка ми е автентичена приказна за љубовта, за личната драма, за траумите и понижувањата на една современа Американка.

Бети по неуспешниот брак се вљубува во штотуку дипломиран лекар - Иранец. Љубовната идила по две - три години завршува со брак, а по извесно време брачниот пар одлучува да го посети Иран заедно со нивната тригодишна ќерка.

Иако Бети се плаши дека оттаму нема да се врати, сепак одлучува да го придружува својот сопруг. Патувањето се совпаѓа со периодот кога во Иран се случуваат крупни политички промени, односно кога на власт доаѓа имамот Хомеини и кога Иран станува Исламска Република.

Нејзините стравувања многу брзо стануваат реалност: Таа со својата ќерка Махтуб станува заложник на мрачното семејство на нејзиниот сопруг Муди. По низа драматични случувања таа успева да избега од Техеран со својата ќерка и да замине за САД.

Никаде без ќерка ми е книга за бескрајната мајчинска љубов и издржливост, но и за муслиманскиот фанатизам, како и за сударот помеѓу западната култура и културата на исламските државни уредувања.

Купи ја книгата
http://www.kupikniga.mk/BookDetails.aspx?Pr=334

Ќерката на мојата најдобра пријателка - Дороти Кумсон

Тие две се пријателки од првата минути кога се запознале. Кога ниту едната, ниту другата не биле прифатени од страна на сите други околу нив, тие двете се прифатели една со друга...

Цел живот поминат заедно, цел живот во делење на сите добри и лоши мигови од секојдневието, сѐ до оној момент кога се случува најголемото од сите можни предавства - изневерувањето. И тоа не било какво изневерување туку изневерување од страна на двете личности на кои најмногу им верувате, двете личности кои најмногу ги сакате.

Тоа е предавство кое едноставно не може да се прости и секако не може да се заборави никогаш. Освен ако... „предавникот“ не е на смртна постела!

Кога нејзината најдобра пријателка се бори со смртта, таа не бара само да се прости и да се заборави... Таа бара многу, многу повеќе!

„Сакам да ја земеш и посвоиш ќерка ми, таа нема никој друг на овој свет, не сакам ќерка ми да живее во дом и да расте како сирак. Само тебе те има, сакам да ја сакаш како своја ќерка“.

Да му простиш и да заборавиш човек кој повторно никогаш нема да го видиш е едно, но да имаш вечен негов потсетник и спомен, секој ден до крајот на животот пред своите очи е сосема друго. Особено за жена која никогаш немала свои деца и што е најтрагично од сѐ, никогаш не ни сакала да ги има...

Каков ќе биде животот на Кам откако овој мал ангел-потсетник ќе влезе во него оставам на вас самите да дознаете. Уште колку тајни кои биле скриени од неа ќе мора да дознае и да проголта, исто така ќе ве оставам самите да откриете.

Купи ја книгата

http://kupikniga.mk/BookDetails.aspx?Pr=333

Педесет нијанси потемно - Е. Л. Џејмс

После бурниот почеток и изненадувања кај двете страни Ана и Кристијан се конечно заедно, како дечко и девојка. Кристијан сфаќа дека за да биде со Ана мора да си ги смени навиките, односно да ја гледа Ана како рамноправен партнер, не како потчинет сексуален роб, а Ана од нејзина страна ги прифаќа сексуалните игри на Кристијан, до одредена мера. Иако ненавикнат на споделување на мисли и емоции, Кристијан се наоѓа во позиција каде мора самиот да си признае дека му е убаво. Сфаќа дека ја сака Ана и дека дотогашниот начин на живот веќе не му е привлечен ниту потребен.Сѐ додека ја има Ана ќе биде среќен.

Но, Ана откако реши да живее со Кристијан почнува да открива за неговото минато, за тоа колку партнерки имал, што правел со нив, каде се сега...

Сѐ додека не се соочи со поранешните „девојки“ на Кристијан. Некои од нив се рамнодушни, некои од нив се опсесивни, некои од нив сѐ уште контактираат со Кристијан, а една од нив му е еден вид најдобра другарка. Љубомората си го прави своето. Ана не може да се помири со фактот дека Кристијан ја смета убавата постара дама Елена за најдобра другарка. Таа е тој монструм што го завела како дете и го вовела во тој изопачен свет на BDSM.

Покрај проблемите со врската Ана има и други проблеми на новото работно место, Кристијан ја користи својата моќ да ја унапреди Ана во нејзината работа, на која таа неизмерно му се лути, а нејзиниот шеф се однесува премногу либерално и крајно непристојно кон неа. Дали ќе успеат двајцата Ана и Кристијан да ја надминат љубомората, дали нивната љубов е доволна да ги издржи сите тие препреки и поранешни девојки кои чекаат зад затворени врати со пиштол в рака?

Овој е вториот дел од трилогијата на Педесет нијанси која изобилува со секси сцени, врзани раце, брзи коли, црвени сатенски постелнини, искинати фармерки, свилени чорапи и подвезици, внатрешни божици и повеќе изјави на љубов отколку што може еден човек да издржи пред да му стане лошо.

Купи ја книгата
http://www.kupikniga.mk/BookDetails.aspx?Pr=11408

Злоба - Даниела Стил

Злоба е роман за една жена, Грејс Адамс, која мора да се бори за да си го среди животот... но да почнам од почеток.
Грејс Адамс има тежок живот уште како девојче. Мајка ѝ умира, а татко ѝ сексуално ја злоупотребувал уште од нејзината шеснаесетта година. Ноќта спроти погребот на мајка ѝ, татко ѝ сакал повторно да ја злоупотреби, но таа го убива во обид да се одбрани, бидејќи не може повеќе да го трпи неговото малтретирање. Има само двајца кои ѝ веруваат на зборот, но сепак таа оди во затвор.
По завршувањето на затворската казна таа започнува нов живот: без семејство, пријатели, работа и дом. Од каде ли треба да почне?
Јасно ѝ е дека треба да започне од почеток, да започне нов живот, но каде е почетокот кога веќе е обележана како убиец. Каде и да оди, што и да прави, минатото секогаш ја стигнува и ја враќа во реалноста.Успева да се вљуби во прекрасен човек, Чарлс Мекензи, кој без оглед на нејзиното минато ја сака таква каква што е. Но поради неговата кариера, Чарлс е постојано во центарот на вниманието и повторно минатото на Грејс испливува на површина. Тоа е периодот кога Грејс ќе треба да плати висока цена за тоа што го сторила во минатото, како затворската казна да не била доволна! 

Ова е роман за една многу силна и храбра жена, која користејќи го тоа низ што поминува во минатото, се труди да им помага на жените кои се во слична состојба, како што била нејзината, им помага да можат да се справат со таа ситуација, но не на начинот на кој таа реагирала.
Обично романите на Даниела Стил не се оние по кои трагам кога сакам нешто да прочитам, но сепак кога видов за што се работи од прилика во овој роман, знаев дека љубопитноста ќе надвладее и не згрешив што го прочитав. Се надевам дека и вие нема да згрешите и ќе успеете да го доживеете романот така како што Даниела Стил сакала да ви го пренесе.

Сега и засекогаш - Даниела Стил

"Сега и засекогаш“ е едно од првите дела на Даниела Стил, напишано 1978 година, а денес достапно и на македонски јазик.

Раскажува за најтешкиот период од заедничкиот живот и брак на Џесика и Јан Кларк. Иако тие се во брак веќе седум години, сметаат дека возбудата и страста сè уште не исчезнале. По барање на Џесика, Јан дава отказ во фирмата за рекламирање за да стане писател (иако тоа не му оди баш од рака) и тој е целосно финансиски зависен од Џесика и нејзиниот успешен бутик во Сан Франциско.

Во еден момент на слабост, иако ја сака својата сопруга повеќе од било што на светот, Јан ќе има љубовна афера со друга жена и ќе биде обвинет за силување и ставен во затвор.

Ова создава кошмар кој се заканува да разруши сè она што Џесика и Јан го граделе во текот на својот живот. Џесика, сакајќи да ја ублажи болката, се свртува кон таблети за смирување кои повеќеѝ создаваат зависност, а Јан во затворот се бори со грижата на совеста, не можејќи да ѝ даде никаква поддршка на својата сопруга.

Оваа ситуација од корен ги менува нивните животи,засекогаш.Дознајте која е цената која двајцата ќе мора да ја платат за една непромислена постапка и дали навистина љубовта може да победи сè.

П.С Те сакам - Сесилија Ахерн

Една неповторлива љубовна приказна која остава без здив.Повторно една од тие книги кои Ве тераат 20 минути да се смеете на глас, а 20 минути да плачете како дете. Нејзиниот маж во најтешките моменти и денови кога згаснува неговиот живот пишува писма за неа кои таа треба да ги чита секој први ден од месецот по неговата смрт. Не, не ги отвора порано од договореното иако умира од желба да го стори тоа и да ги прочита последните зборови на својот сакан туку внимателно ги почитува неговите упатства.
Како една млада вдовица да продолжи да живее кога на овој свет повеќе го нема нејзиниот сакан? Низ многу ретроспективи во книгата се гледа колку многу тие се сакале, какви убави моменти поминувале заедно, а потоа се опишани и моментите по неговата смрт, ужасни и тешки за неа.
Таа плаче додека солзите не пресушат, се смее во моменти на очај кога знае дека не може да го врати назад, таа се обидува да се затвори сама изолирана од светот и да тагува... Но нејзините пријателки и роднини не дозволуваат така да живее...

Нема да откривам повеќе на оние кои не ја прочитале, само ќе им кажам дека мораат веднаш да дојдат до неа!

Вештица - Венко Андоновски

Кој не ја видел - тој не се родил
кој ја видел а не ја вкусил - тој умрел
кој ја вкусил - тој не куртулил,
оти ќе живее.
Јас, а можеби и Ти

Венко Андоновски е еден од најдобрите македонски писатели, напишал еден неверојатен и уникатен роман. Неговата уникатност ја гледаме уште од првата страница на која е напишан насловот на книгата а под неа стои: - Роман во сурова состојба - (Тетратка на еден писател). Романот е поделен на два дела. Едниот дел, кој е всушност и главната приказна, говори за милион жени кои биле изгорени на клада под обвинение дека се вештици.

Овој дел е пишуван со вообичаени букви, а другиот дел е пишуван со закосени букви, кој според мене е и оној кој го прави да се разликува од сите досега прочитани книги.

Токму во овој дел можеме да ги забележиме карактеристиките на постмодернизмот. Закосените букви говорат за различни приказни, за животите на различни луѓе, па и индиректно за животот на писателот. Кога ја читате оваа книга, писателот Ви се обраќа лично на Вас. Како Вие да сте оној кој ја пишува. Вие сте причината за таквиот тек на дејството. И се чувствувате како дел од книгата, како лик, навистина влегувате во тој филм на писателот и Ве освојува, Ви поставува прашања на кои дури Ви остава празни редови да одговорите, да ја пополните книгата. Ви задава задачи и додека го правите тоа се чувствувате како да сте внатре во книгата, како да сте дел од тој свет. Не Ви се верува како Ви се обраќа и како знае што всушност чувствувате додека го читате романот. Има моменти кога сте занесени во приказната за вештиците и тој намерно Ве прекинува, Ви се обраќа за да Ве освести да се вратите во реалниот свет.

... И врескаш: роман, роман, роман! Ма немој! Така се пишувало роман! А кој да ти го напише?! Јас? Зошто би ти го напишал, ти разгалено суштество седнато на топло, во соба, во автобус, во трамвај, во чекална, во авион, во тивка библиотека, легнато во топол кревет, со корици во рацете; ти лакомо и незаситно суштество што сака да голта суво злато, а да не ја цени потта на златарот...

Така книгава Ви носи ново доживување. Не сте само пасивен читател, туку токму и тоа е карактеристиката на постмодернизмот да сте дел од приказната. Книгава ќе Ви донесе ново искуство, досега недоживеано. Од некои задачи кои Ви ги задава писателот, не извршив само една, бидејќи не сум од Скопје, а верувајте бев подготвена и да отидам до Скопје само поради тоа, но ете се надевам дека откако ќе ја прочитате, некој ќе ја заврши, па ќе коментира овде дали е вистина:

- Појди по кејот. Кон старата кланица. Од "МАНУ" до кланицата има вкупно 938 плочки. Ако ја кренеш 666-тата, под неа ќе најдеш нешто многу вредно!

Купи ја книгата
http://www.kupikniga.mk/BookDetails.aspx?Pr=1027

Раскажи ми ги соништата - Сидни Шелдон

Три преубави жени: Ешли, Тони и Алет се осомничени дека направиле повеќе брутални убиства. Мажи со кои тие се гледале и тоа во различни земји се убиени, искасапени и кастрирани.

Сите работат во иста компјутерска компанија. Двете се пријателки, а третата девојка не ги познава другите две.

Ешли Петерсон е американка, осамена и срамежлива компјутерџика која не згазнува ниту на мравка, но таа има чувство дека некој ја следи, дека сака да ја убие иако не знае зошто. Тони е англичанка, дрска кавгаџика склона кон луди ноќни прошетки и флертувања на интернет. Алет е смирена, наивна италијанска уметничка душа.

Полицијата ќе ги уапси и следува едно од најбизарните судења на векот. Заснована на вистински настани, оваа книга нè води од Лондон и Рим до Квебек и Сан Франциско и нè остава со гримаса на изненадување.

Загубената ќерка - Дајен Чемберлен

Често животот нѝ спрема чудни изненадувања и нѐ става пред тешки крстопати, пред кои мора да донесеме важни одлуки од кои ќе нѝ зависи понатамошниот тек на нашиот живот. На тој начин сами си ја одредуваме сопствената судбина.

Токму тоа ѝ се случува на Сиси Вилкис- главниот лик во овој преубав роман. Кога Сиси има шеснаесет години нејзиниот живот тргнува во сосема спротивен правец, сосема спротивно од она што таа го планирала и посакувала за себе.

На дванаесет годишна возраст Сиси останува сирак, кога нејзината мајка умира таа живее по домови и различни семејства.

На шеснаесет години Сиси конечно го средува својот живот- работи како келнерка во еден ресторан и собира пари за да се запише на колеџ. Тогаш се вљубува во убавиот Тим Глисон.

Тим полека ја вовлекува Сиси во неговиот свет и ја убедува да учествува во неговиот план да ја киднапираат жената на гувернерот за да може да ја намали казната на својата сестра која е осудена на смрт поради убиство. Сиси е премногу заљубена во него и прифаќа да учествува во тоа. Нејзината задача беше само да ја чува жената на гувернерот додека Тим и брат му Марти преговараат со нејзиниот сопруг.

Но работите се комплицираат...

Животот на Сиси се менува од корен и таа е свесна дека ова не ѝ го направи судбината туку си го направи самата таа и сега мора да ги трпи последиците од тоа. Каков ќе биде животот на Сиси и Корин ве оставам да откриете сами, мене оваа животна приказна ме обзема и не можев да ја оставам сѐ додека не ја дочитам, бидејќи оваа книга нѐ учи дека некогаш самите си ја одредуваме својата судбина, а последиците од тоа ги чувствуваме цел живот.

Тунел - Петре М. Андреевски

За љубителите на македонските мајстори и нивните дела.
Нешто што вреди да биде дел од вашиот список на прочитани книги.

„Кога го создавав романот имав проблем, како да се заштитам од себеси. Во овој роман сите ликови се создадени во мојата имагинација, но ништо не е случајно тие се сместени во вистинското време и место, тоа е навидум имагинарно, но литературата е лага која само ни помага полесно да ја запознаеме вистината“ - Петре М. Андреевски за „Тунел“

„Ако мислиш и ти да бегаш – ми вели, никогаш да не се обѕрнуваш назад. Твоето свртување може да биде кобно- ми вели, зашто ќе дознаеш кој е тој што те брка. Ќе му го видиш лицето и може да се рпедадеш. Ќе застанеш и ќе му се предадеш –вели. Затоа бегај се додека не се умори тој што те брка. Додека не те заборави. 
И додека ти не го заборавиш него “ - извадок од романот

Затоа што те љубам - Гијом Мисо

Петгодишната Лајла исчезнала во еден трговски центар во Лос Анџелес. Длабоко потресени од оваа трагедија, нејзините родители се разидуваат. Пет години подоцна, Лајла се појаува на истото место на кое и се изгубила секаква трага.
Жива е,но од некоја причина,таа не зборува. Сите се среќни заради нејзиното враќање, но се јавуваат и неизбежни прашања. Каде била Лајла сето ова време? Со кого? Но, пред се, зошто се врати?
Оваа трогателна човечка драма всушност е волшебна љубовна приказна која се вовлекува во мистерија  и ве држи во неизвесност. Приказна чиј крај нема така лесно да го заборавите.

Купи ја книгата 

http://kupikniga.mk/BookDetails.aspx?Pr=1675

Јас те сакам повеќе - Лиса Гарднер

КОГО САКАШ?

Едно прашање, минијатурно делче од секундата и Брајан Дарби паѓа мртов на кујнскиот под во својата куќа. Неговата сопруга, државната полицајка Теса Леони, тврди дека го застрелала во самоодбрана, а нејзиното модро лице и скршени коски ја поддржуваат таа приказна. За искусната детективка Ди Ди Ворен, случајот е прилично јасен. Само што... каде е нивната шестгодишна ќеркичка?

И КОЛКУ ДАЛЕКУ БИ ОДЕЛЕ ВИЕ...

Детективите ја започнуваат потрагата по девојчето додека истовремено се трудат да ги откријат сите семејни тајни. Дали една тренирана полицајка навистина би си го застрелала сопругот? Зошто? И дали една мајка е способна да го повреди сопственото дете?

... ЗА ДА ЈА СПАСИТЕ?

За Теса Леони, најлошото следува дури сега. Таа чекори по тенко јаже, не може да побара помош од никој, не смее никому да верува. Таа има само една цел и планира да ја искористи секоја секунда тренинг за да дојде до неа. Ниедна жртва не е преголема, ниедно дело не е незамисливо. Мајката знае кого сака...

Купи ја книгата 
http://www.kupikniga.mk/BookDetails.aspx?Pr=1130

Сликата на Доријан Греј - Оскар Вајлд

За сите оние кои сакаат фантазија, нереалност, бајки... Го гледав и филмот и морам само да признаам дека очекував малку повеќе, но тоа сум сепак јас, верувам дека оние кои сакаат ваков тип на книги, ќе имаат доста интересно време со оваа книга или филм. Возбудлива приказна за човек кој си ја продава душата во замена за вечната младост. Не, не е Шагринска кожа...
Прифаќајќи еден нов вид хедонизам кој на прво место ја става телесната убавина, Доријан Греј посакува да остане вечно млад. Тој се откажува од сите вредности и желби на обичниот човек со една цел, да ја задржи својата младост и својата убавина.
Желбата му се исполнува, но го вовлекува во серија развратни постапки.
Неговиот портрет, иако скриен од сопствените и од очите на светот, станува потсетник на ефектите што ги има секое извршено дело врз неговата душа. Секој сторен грев го нагрдува некогаш насликаното младо и убаво лице, го закитува со нова сурова црта на усните, со нова брчка на челото.
Но доаѓа ден кога се појавува црвот на сомнението, потребата за соочување со себе. Доријан Греј ќе собере храброст да се извлече од канџите на себезалажувањето и да ја фрли маската. Но кога ќе погледне во својата соголена душа – гледа само грдотија што го ужаснува.

Педесет нијанси на сива - Е.Л Џејмс

Младата апсолвентка по книжевност, Анастасија Стил, мисли дека има проблеми. Таа е ситна, со нескротлива коса, срамежлива и сѐ уште девица. Вози искршена буба и за една недела ги полага финалните испити на факултет. Ѝ треба време за да учи, ама покрај сето ова е приморана да ја замени својата цимерка, прекрасната Кејт, уредник на студентскиот магазин, која има лоша настинка, да оди во Сиетел за да го интервјуира младиот милионер Кристијан Греј.
Лута на Кејт, на себе и на светот оди на закажаното интервју, потполно неподготвена. Влегува во импозантната канцеларија на г. Греј, се сопка и му паѓа право в раце. Уште од првиот допир осеќа електричен шок. А г. Греј е млад, успешен, секси, арогантен и пребогат.Интервјуто почнува, а Анастасија иако неподготвена и срамежлива, успева во рок од петнаесет минути да го насмее, изнервира и да го шармира г. Греј. Си заминува за Портланд со мислите на учењето.Во наредните денови г. Греј е секаде каде што е таа, дури доаѓа каде што работи и купува разен асортиман на јажиња...Aна е шокирана, сите ѝ велат дека богатиот ерген е тука заради неа и да ја искористи оваа прилика. Но Кристијан постојано ја предупредува дека не е за неа.Не можејќи веќе да издржи го приморува да ѝ каже зошто не е за неа. И тука почнува вистинската приказна, кога Кејт ќе види дека таа и всушност немала никакви проблеми пред да го запознае г. Греј кој не дозволува никој да го допре.Тој е Доминант. Сака сексуално потчинети партнерки и сака сексуално да ја потчини Ана. Ѝ ја покажува својата Црвена соба на болка и задоволство и очекува таа да избега како од ѓавол. Но, Ана секогаш успева да го изненади. Не бега од него, не го осудува. Кристијан ѝ дава избор, да потпишe договор со правила и да му стане потчинета или слободно да си замине... A Ана, не прифаќа ни едно ни друго, туку му ја дава својата невиност. Шокирајќи го до неверување.Книгава не е некое книжевно богатство. Прозата е слаба, дијалогот неспектакуларен, дури ни секс сцените не се толку жешки. Ама сите ќе сакате да дознаете зошто е Кристијан таков каков што е.Што му се случило во детството што во негови зборови „го довел до педесет нијанси на изопаченост“? Дали Ана ќе успее да го „излечи“ од неговите перверзни потреби?Иако е критикувана како „порно за жени“ или премногу перверзна, јас повеќе би рекла дека тој дел од книгата е ставен во втор план. Првенствено се работи за емоции. Емоциите на Кристијан, од кои бега, сака сѐ околу него да контролира, ама никако не успева тоа да го направи со Ана. Дали љубоморниот контрол фрик ќе успее да сфати што всушност чувствува за неа? И емоциите на Ана, страв од него, страв од неговото уживање во задавање на болка, страв од нејзината новопронајдена темна страна, неверување, привлечност, љубов. Книгава е само првиот дел од трилогија наречена „Педесет нијанси“. Почнала како фан фикција за книгите „Самрак“ и преминала во нешто сосема друго. Авторката Е. Л. Џејмс ја издавала глава по глава на нејзиниот сајт и наскоро станала најбараната книга кај жени меѓу 25 и 50 години. Апсолутен хит во моментов.

Линк за онлајн читање на оригиналното издание на англиски јазик

http://www.louthparanormal.co.uk/E_L_James_-_01_-_Fifty_Shades_of_Grey.pdf

Купи ја книгата 

http://www.kupikniga.mk/BookDetails.aspx?Pr=11134